【生活樂與怒】用￡4.2寄封信俾自己？

用￡4.2寄封信俾自己？給自己的情書？真係冇朋友得咁緊要？當然非也！ 

話說小女拜託我將一份小禮物寄返香港俾好朋友，送完佢返 Edinburgh 嘅宿舍回程途經 Holy Island 嘅時候，見到有 post office，咁就入去順便寄咗份件，間郵局附設喺一間餐廳入邊（此乃英國常見現象，郵局有時會藏身於超市、Cafe、書局等地方），雖然我覺得佢個樣唔係好專業，因為賣手信同 cake 嘅櫃位佔了大半間舖，不過叫得做 post office, 都唯有信佢啦！反正都係寄封信啫！嗰位亞姐好快手收完我錢，就將填好嘅海關申報表貼喺信封面 (仲要將申報表蓋著地址，要我重新寫一次)，郵票標籤就貼咗喺信封底，然後就話 ok！

果不其然，原來唔專業真係有樣睇嘅！過咗兩日之後，我行過家中大門信箱位，咦！點解封信咁熟口熟面嘅？唔睇尤自可，一睇把幾火！咪就係前兩日寄出個封信，咁詭異！真係喺香港幾十年都冇試過咁嘅情況喎（除咗係寫錯地址打回頭或者無此人之外）！ 

睇勻成個信封，除咗爛咗一忽之外，完全冇啟示究竟點解會打回頭。

唯有入城去 Durham 嗰間郵局度問個究竟。第一個後生女職員求其瞄咗一眼就話因為我冇填好海關申報表（明明就填好咗！），我都係信佢唔過，就搵咗一個年長D嘅職員問，佢就話，哦！因為你個郵票標籤貼錯咗去信封底，所以咪 send 咗去 sender 個地址囉！實在我覺得都唔係理由，原因根本就係遇著個做嘢求其事但的職員，將個郵票亂咁貼，然後又放錯咗去 local post 個 box, Durham 郵局見 Durham 地址咪派囉！ 

終於，我又要花多 70p 買個新信封, 加￡4.2 再寄一次！在英國生活真係唔嬲得咁多！