【生活樂與怒】倒垃圾都關鄰居事？

來英國之前成日都聽到人哋話喺英國生活，「睦鄰」係非常之重要，我地好快已經感受到了。話說我哋暫居朋友新屋，因為係新建成獨立屋，所以入住嘅時候第一時間就去 council申請新垃圾桶 Rubbish bin 、回收桶 Recycle bin（回收紙同塑膠）和回收盒 Recycle box （回收玻璃器皿）。

Council一星期來一次，垃圾同廢品是隔週回收，當桶送到來嘅時候，我地立刻將廢物放入桶，好快就到咗下一次嘅回收日， 但係、但係我地發現滿滿嘅回收桶在傍晚時份仍然依然固我屹立花園前！ 

當我地以為Council既然已經知道依間屋買咗桶，一定會通知工人收埋依間屋的垃圾廢物品，咁就太天真了！ 我地第一時間send email去Council報告， 佢好快回覆話最遲三個工作天會派人再來，於是我地又好天真咁信以為真，但事實邊有咁理想呢！ Council下次再來就係收垃圾，如果佢又忘記我哋呢間屋，咁就大件事啦！ 我唔想變咗住烏蠅屋呀！

此時就諗到不如找鄰居幫忙，請佢容許我地貼張紙喺佢個垃圾桶上面，提醒工人唔好忘記隔離屋（即係我哋），既然要請素未謀面的人幫手，冇理由兩手空空去敲門，好彩家有一位連衣車都跟身帶過來的裁縫同一位處女座追求完美的少女，立馬動手縫製一個環保袋同手繪問候咭。

完工就事不宜遲，拿著小禮物就戰戰競競去敲門，應門的是女主人同佢可愛的女兒，好彩女主人好友善，寒暄一番之後不單答應我地要求，仲好熱心執塊石頭（梗唔係揼自己隻腳）壓住嗰張提醒工人的A4紙！ 嗰次真係成功令工人往後都記得收我地的垃圾廢品！

順帶一提，英國每個地區的rubbish and recycle 的做法不盡相同，Durham 就分 Rubbish Bin、Recycle Bin、Recycle Box以及Garden Waste Bin, Garden waste 係指花、草、樹枝等等，而Council 現在已經停收2021年的 Garden waste 新申請，所以正煩惱如何處理花園一袋袋的雜草！