前往英國之前瀏覧過多個移民資訊 page，好多人嚟到英國都是由阿媽出手幫全家人剪頭髮，原因當然是出去理髪又貴又唔方便，所以有啲人好有心機去學定剪頭髮先移民。太太本來都有咁嘅打算，但係最後都係因為太忙而放棄。以往佢只會剪自己的留海和修剪亞女的長髮，來到英國就只係憑著幾十年「被剪髮」嘅經驗空槍上陣，把我當作「實驗品」！
最初只係買咗兩把新髪剪 (在彩虹邨文具店買，每把盛惠 $65！) 跟身，太太諗住幫自己同阿女修吓髪尾而已，後來好朋友主動幫我哋淘埋髪鏟 (盛惠幾十人仔！)，話可以幫我剪埋，一定有用，記得跟身！嗰位好朋友仲話，男人頭剪壊咗最多戴頂帽，好快啲頭髮就生番出來云云……真係夠朋友囉！
其實喺細細嘅 Durham 市中心大街方圓幾十米就有五間 barber shop, 收費都合理，最平 crew cut 十鎊有找，不過初來報到，慳得就要慳！大概一個月之後，我家太太就膽粗粗動手幫我剪髪， 剪加染，斗零唔收！
難得嘅係，佢竟然仲夠膽將「作品」相片 send 俾我地香港個髪型師睇，髪型師話剪得唔錯喎！（佢真係信㗎！現實可能髪型師一見啲相就講咗粗口！）
其實，我想讃自己勇氣可加多D，需知道佢連一隻髮夾都無帶㗎！究竟點分 layer 剪呀？後來佢仲自爆嗰把全新髮梳都係 N 年前住東橫 Inn 時拎的 (我地好似好耐冇住過東橫 Inn 喎！)，圍裙都冇，佢竟然係用垃圾袋剪咗幾個窿叫我著住！啤.....！
自從我兩次成為「實驗品」後，家中一名少女竟然自願「以身犯險」，成為另一名「實驗品」，事事追求完美的處女座少女說幾滿意，佔仲話佢有剪髮 sense！太太竟然沾沾自喜，難道佢以為就憑文具店髮剪、淘佬髮剷、東橫 Inn 梳、Poundland 垃圾袋可以去開檔幫人剪髮！
Comments
Post a Comment