以前喺香港成日都聽到人哋話外國的售後服務好好，可以隨便退貨，我嚟咗短短兩個月都試過幾次去退貨，完好無缺嘅貨退俾我都唔出奇，但係壞咗嘅都可以「閃退」就真係抵讚嘅。
上回提到喺 Currys 買剪草機冇貨，朋友就係 Argos (英國另一大型連鎖電器家品店）再買過另一款，我哋拎貨之後就立刻去試下部機，諗住如果有問題就快啲拎返去換（香港人慣咗咁！）。
順利剪完後院嘅草地之後，部機忽然慘叫雞咁叫，之後仲出晒煙添，最後唔使問梗係死鬼埋啦！
唔通我哋真係烏鴉口？ 其實當時都有諗可能係自己使用不當令到部機死咗，anyway，點都要打去售後服務電話睇吓有咩可以做。接電話嗰位職員聽到我話部機壞咗之後，諗都唔諗就叫我哋拎返去 Argos 換部新嘅，冇問點解壞、冇問 case reference number……，搞到我都半信半疑，就係咁簡單？
我哋拎返部機去 Argos 時，職員冇研究過部機咩狀況，齊唔齊件，即刻開返張新單叫我哋過幾日去拎返部新嘅，原來就係咁簡單！
有日同一個嚟咗兩年嘅朋友傾偈，分享咗呢件事，佢話有個朋友喺 Costco 買咗個唔甜嘅西瓜，食完之後，竟然拎返堆「西瓜皮」去退款 (你冇睇錯！真係「西瓜皮」！)，而又真係成功退錢， 你話神唔神奇？
Comments
Post a Comment