英國做好多嘢都要講 Credit Score，初嚟報到，我地一切都要由零開始， 冇英國受薪工作，基本上唔能夠申請到信用咭，開頭唯有暫時用住 Debit Card 先。
因為極愛旅遊，我同太太喺香港咁多年，一向只會將信用卡積分換飛行里數，來到英國，梗係想繼續儲 mileage，不過冇理由仲用港幣信用咭，但如果冇英鎊信用咭咁算好？
來英國前已經見到網友教路，如果本身喺香港冇用 AE card，嚟英國至少三個月前之前就要申請番一張，因為英國 AE 可以利用香港 AE 的連繫做到 global transfer，出張英磅 AE 俾你。
到咗埗我就即刻親身試下，我地就咗揀申請「British Airways American Express® Credit Card」，因為免年費，又可以自動轉 Avios （以前係因航 fans, 現在梗係轉會 BA 啦），申請過程大致都係同網友分享嘅差唔多，以下只係我個人嘅經歷：
- 網上申請，輸入資料後（好簡單，幾分鐘可以入完），佢會直接話你的申請被拒絕，另有一個查詢電話同 reference number 俾你。
- 致電查詢電話，找到真人職員對話，說明要做 global transfer，職員會將申請由 refused 轉番做 pending。
- 收到 email 要求交入息證明，由於未有收入，最後我交咗銀行存款證明。
- 之後又收到 email，要求補交身份證明文件及地址證明，我即日補交咗 psssport copy 同埋銀行月結單 (當然要係英國地址)。
- 幾日後，有職員打來話文件 copy 唔清楚，話同日會 send email 來叫我補交，但最後沒有收到 email。
- 翌日，收到職員電話話申請已 approved, 十日內會收到咭（又話要補交文件？又再次證明「認真便輸了」！
- 幾日後，收到咭，前後唔夠一個月，以英國標準來講係「超快」！
備註：打去查詢電話，接電話嘅係 AI，佢會問你打來做乜，我試咗幾個答案先搵到真人對話，原來要答「checking application status」，佢就識搵真人同你對話！
英國好興用 AI 接電話，有時發音唔準或者你嘅答案佢冇法辨識都會令人覺得好煩，例如我話「global transfer」，可能佢系統預設冇這個答案，佢就會 keep 住問你其他 options，香港人應該唔係幾慣，不過試多幾次就會習慣啦！
（以上只係我自己親身經歷嘅分享，並且絕無賣廣告成份，資訊未必係最全面，如有錯漏請多多指教）
Comments
Post a Comment