人只要仍然生存緊， 都會遇到好多生活小問題， 以往在香港生活實在太方便， 現在就要重新適應依度嘅辦事方式同埋節奏。 話說上星期有一日用完洗碗碟機之後發現洗碗碟機下方嘅地板全部都係水， 打開洗碗碟機一睇，原來個底盤去唔到水，應該係經過門隙滲出來，咁好自然反應梗係打開這個蓋那個蓋睇吓有冇嘢塞住，然後用人手將水先吸走，試咗幾次部機仍然顯示 error， 上網查過，個 symbol 應該係話有漏水，咁就冇辦法了，一定要搵人來檢查一下。
問咗上手業主， 佢介紹咗一個相熟嘅維修師傅， 我就即刻聯絡佢， 約好幾日之後上門維修， 到咗約定嘅日子， 師傅好準時嚟到， 檢查咗之後佢話應該係一次性嘅問題， 可能係有垃圾塞住咗去水位， 不消 15 分鐘已經整好， 又講咗好多關於洗碗碟機嘅小知識我聽，態度有禮， 最後佢話今日收費係 ￡25 ，正當我想問佢收現全定過數俾佢時，佢就俾咗張咭片我， 叫我試多幾日真係冇問題先至過數俾佢， 如果有問題就要叫佢再嚟睇睇！
老實講， ￡25 真係平過我預期（香港上門睇一睇都最少收幾百）， 而且佢叫我試用幾日之後先俾錢我都覺得有啲意外， 可見這裏啲人都真係「出嚟行講個信字」！ 希望呢個咁好嘅信任制度唔會某一天俾人玩爛咗！
Comments
Post a Comment