揸得架車出街，好少會未遇過爆呔，喺香港好彩嘅話，咁啱附近有呔舖，花十幾分鐘，俾幾廿蚊就搞掂，但係嚟到蘇格蘭，就係另一個完全唔同嘅故事。話說我哋由 Newcastle 開車返去Edinburgh 途中，標版顯示其中一條呔唔夠氣，仲要即刻停車添。
要知道條呔係 runflat tyre，爆咗通常都仲可以行幾十公里，依家要即刻停車，應該都爆得幾嚴重。不過喺高速公路上面，仲要黑到伸手不見五指，唔係話停就停，唯有繼續頂住先，去到十里外嘅一個小鎮 Dunbar (距離 Edinburgh 大半個鐘頭車程)。
去到市中心停咗車，即刻出動 Google Maps 瘋狂搜索，但係搵嚟搵去都搵唔到，因為已經接近六點，全部都閂晒門。最後搵到一間準備拉閘嘅整車舖，即管去碰碰運氣，結果呀師傅睇咗陣，試吓幫我打啲氣入去，點知一打啲氣就漏返出嚟，證明個窿應該都好大吓。最後，唯有將架車泊返去火車站附近，坐火車返 Edinburgh，番屋企再算（好彩係用咗runflat tyre，如果唔係㗎車應該碌到碌唔到）。
故事去到第二日，我坐火車返返去 Dunbar，打電話搵到一間本地嘅呔舖 Border Tyres Ltd，佢話冇我嗰隻呔，但就可以搵人嚟幫我睇吓可唔可以補到。估唔到又真係幾快喎，佢唔使 10 分鐘已經揸住架大貨 van 嚟到，睇咗幾眼，即刻幫我「唧」起架車搞搞。
鬆條呔之前，佢問我攞個鎖頭，搞到我一頭霧水，後來先發現原來貯物箱裏邊有一個頭，係專係用嚟鬆車鈴螺絲嘅。專業人士就梗係快手啦，一陣間就將條呔拆走，仲搬埋上去㗎 van 度。原來佢架車度有齊晒啲工具，有發電機之餘，又可以打氣，又有部機可以拆埋條呔添，好似成間流動呔舖咁款。
可能個窿太大，佢補呔嘅方法唔同香港咁塞舊嘢落去，而係將條呔拆咗，喺內側「mun」啲嘢上去。成功搞掂咗，師傅話條呔只可以用到一段好短嘅時間，不過起碼足夠我捱返去 Edinburgh，之後就要再換條新呔。今次爆呔體驗盛惠 £43，以佢揸埋架車嚟幫我搞嚟講，其實都唔算好貴，不過希望呢啲經驗真係唔好再有下次。
P.S. 之前一直懶，未有去 check AA 或者 RAC 的 breakdown service，經過今次之後，我即刻上網買咗 AA 嘅 breakdown 服務，如果下次真係萬一唔好彩喺公路邊爆軚都唔使咁徬徨無助。
Comments
Post a Comment