【球迷奇遇記】去晏菲路探孫仔？

再三感謝我嘅 AXA 保險顧問。

話說保險顧問因為 qualified 咗 AXA Prime，可以攞到利物浦波飛轉送俾喺英國嘅親朋好友。繼歐聯【晏菲路 AXA Executive Suite 神奇體驗】及【雙紅會】之後，保險顧問再次送飛俾我，等我又有機會第三次踏足晏菲路，萬分感激。

話說小女是韓星忠粉，不單止愛 K-Pop，連球星也不放過，獨愛孫興慜，因此今次遇上利物浦大戰熱刺，自然要跟住我去見見孫仔。我自己十分欣賞干地接手之後嘅熱刺，節奏明快，攻勢快速、直接，特別係加入咗來自祖雲達斯嘅比坦古同古路錫斯基之後，呢兩個「鹹魚」完全翻生，場場有表現，幫助熱刺打出好成績，干地果然有料到，搞到我都變埋熱刺 fans 添！

講返今場波，熱刺雖然踢得被動，但防守穩健，破高位逼搶亦訓練有素，而孫仔亦不付所望，成功入球，可惜我哋坐喺利迷堆中，唔敢慶祝，其實勁想起身歡呼，但仲要扮晒冷靜咁。