話說近年甚少睇網球比賽，對上一次睇電視直播，相信仲停留咗喺森柏斯、阿加斯同莎芭天妮嘅時代，當然，亦唔會唔識得費達拿、拿度、祖高域，不過就真係冇睇過佢地比賽。今次適逢其會，估唔到自己會有機會親身入場睇到溫布頓，可說係是次行程的亮點之一。
最出名嘅球星，會喺 Centre Court、No.1 Court 同 No.2 Court 比賽，如果事先冇賣飛，就可以坐喺 The Hill 睇電視直播，都相當有氣氛。俾咗 ￡27 入場費之後，原本以為只可以去 The Hill，但入場後先發現原來可以隨便入場睇到喺 3-18 號 court 進行嘅所有賽事，真正「老友鬼鬼，全日任睇」！
好意呢個安排，感覺就好似去咗主題樂園咁，攞住份賽程，睇見邊場好睇就去捧場。雖然任睇，但其實比賽嘅全部都係世界級選手，當中更加有啲係 ATP 排名前十嘅球手，完全值回票價。
睇咗幾場，發覺都睇坐山頂位最舒服，試過坐喺網前睇咗一局，雖說可以近距離睇到球手，但個頭要不停咁擰來擰去，睇完頸都痛！
Comments
Post a Comment