【蘇格蘭小遊記】Fife 海岸小鎮遊

The Queen's Platinum Jubilee 周未天氣超正，唔出動真係對唔住自己，決定搵個距離 Edinburgh 個零鐘頭車程既地方走一轉，目的係 Fife 海岸。

Fife 有幾個港口小鎮，我哋嘅第一站係 St Monans，呢度啲屋色彩好豐富，氣氛好悠閑，搞到我地以為自己去緊旅行添！如果有間食海鮮丼嘅食堂就完美啦！

下一站係另一個小漁港 Pittenweem，距離 St Monans 只有十分鐘車程。入城前先去附近嘅公園仔野餐，對住無敵大海景，食返個自製日本米飯團，簡簡單單就係幸福 (不過上次運嚟嘅日本米已經清倉，要等下一輪物資接濟)。至於 Pittenweem，就似乎比頭先嘅 St Monans 旺少少，碼頭多啲船，岸邊又有雪糕店同 fish & chips，仲有好多貌似遊客嘅物體。