【吃貨手記】行中超我心感興奮

英國有好多中超和亞洲超市，Durham 咁細都有幾間，大城市唔在講，中超亞超有咩賣，相信好多人都講過，調味料、急凍貨、廚具都容易找到。喜歡下廚的，見到琳瑯滿目的貨架一定好興奮，個腦已經彈出好多好多想煮嘅食物！ 

因為只是暫居朋友新居，所以唔敢買太多調味料，只能將就將就，希望快些搬去自己嘅屋，咁就可以大手入貨！ 

有些意外係行亞洲超市嘅時候，發現泰國、韓國嘅調味料竟然冇貴過香港，有啲甚至平過香港，真係好令人意外！ 我家泰傭姐姐仲好擔心我嚟到呢度買唔到泰國嘢，當我send 張相返去俾佢睇嘅時候, 佢都嚇咗一跳, 話點解會平過香港? 

話說家中有人非常愛吃「鹹濕嘢」，臨飛之前一日經過銅鑼灣么鳳都不忘再入貨，但係嚟到又唔捨得開嚟食，真係好矛盾！ 嗰日行愛丁堡中超竟然有開心大發現， 就係見到好好味嘅狀元蕎頭（食過好多牌子，最好食係佢）， 價錢同香港差唔多！ 好快食完一樽，又去encore再買！ 隨時買到就是任性！ 

另外一次去曼城睇波嘅時候順便行中超， 發現有家中少女最愛嘅羅拔臣啫喱粉， 仲有幾種口味！ 當然唔可以錯過， 英國朋友話羅拔臣啫喱粉唔係好常見， 如果真的， 咁我哋能夠買到都算好彩喇！ 

成日有朋友問有咩調味料一定要帶過嚟， 我就首推雞粉，見有家X牌，但不肯定是否我地用開的家X牌，所以冇買，唯有用住其他產地嘅出品先。另外，我地去過好多間中超都唔見有港式蝦醬，越南的倒見過。