住喺英國一定好熟悉「dpd」, dpd係一間好大嘅貨運公司，佢嘅車輛喺公路上常常都會見到，估唔到我哋初到貴境就同佢交手，過程仲有些搞笑！
話說因為原本香港飛英國要隔離十日，我哋原本打算直飛 Edinburgh，但臨出發之前幾日知道唔需要隔離，我哋就改在 Heathrow Airport (倫敦)落機，然後去咗搵朋友，玩下兼順便買車。好開心玩咗幾日又順利買埋車之後，難題就嚟嘞！點樣將我哋一行五人十幾件行李運返上Durham？
於是我哋就上網搵貨運公司，膽粗粗上網俾完錢預約咗人來酒店收行李，司機準時到來，原來是 dpd, 司機友善有禮，第一印象好好，收件日是星期五，客服 email 通知行李星期一會運抵 Durham，我地就自己揸車北上。
本以為安排得好好，然而，翌日朝早十一點幾，我地都仲未揸到去 Durham，就收到短訊，話司機個幾鐘之後會到。睇睇個 GPS，仲有成兩個鐘頭車程，飛車都唔得掂！結果，我地剛剛離開高速公路 (距離屋企仲有十分鐘車程)，就收到追魂 call，司機哥哥話已到收貨地點但為何冇人應門，但都唔想浪費時間解釋，就請佢等十分鐘，話我地已經在歸家途中，佢點回應呢？ 佢話，no, I don’t have 5 minutes to wait！仲話可能 (係可能！)下晝三點再嚟，如果嚟唔到就要等星期一（根本就應該星期一喎！）！
就係咁，我哋返到屋企之後就去食 lunch 同行超市，期間仲收到 SMS，話啲行李會喺星期一送嚟。好快就到咗四點，我地好順理成章以為佢星期一再來之際，電話又響了，司機用非常迫切的語氣話，又冇人應門喎，我地真係俾佢搞到一頭霧水！我地真係冇佢咁好氣，唯有又叫佢等十分鐘！真係謝主隆恩，佢今次話 ok, but i will just wait for 10 minutes！
於是，我哋立刻去攞車飛返屋企, 在短短的車程中，我地一面希望佢唔好咁有性格一夠十分鐘就走，另一方面已經做定心理準備要喺對面線打橫攔截佢架車 (sorry, 誇張咗少少！)，果不其然，我地真的在屋苑迴旋處見到架 dpd 車！
我地立刻響安兼揮手示意，好彩年輕嘅司機哥哥都好醒目，佢一個靚彎就掉頭，然後我地一直啄住佢尾直至去到屋企門口。司機哥哥黑住面搬行李落車，然後黑住面講 thank you very much！搞到好似我地做錯事咁！其實亞 Q 啲諗，可以用咁嘅態度去開工， 應該冇咩壓力！社會就唔會咁大怨氣......都係一件好事！將來如果去打工，我都可以咁嘅態度都好喎！
Comments
Post a Comment